Ramayana lakon Resi Jatayu 2 ragam krama KLS VIII

 Teks cerita wayang Ramayana lakon Resi Jatayu ragam krama.

Resi Jathayu

 

                Jatayu inggih menika peksi Garuda ingkang sged tata jalma kados manungsa. Garuda Jatayu menika putra katiga saking Resi Briswawa, ingkang taksih keturunan langsung saking dewi Brahmanistri, putri Bathara Brahma. Piyambakipun gadhah sedherek tiga inggih menika, Garuda Harna, Garuda Brihawan, lan Garuda Sempati. Sawijining dinten Jatayu kaliyan Sampati sami balapan mabur inggil-inggilan kaliyan wawan rembag : “ Hai Sampati ayo adu kuwat mabur sadhuwur,dhuwure.”  Sampati  mangsuli :” iya Kakang sapa wedi,yen bisa nggayuhasing  dideleng gampang nanging dicekel angel.”Nanging saderengipun kasil nggayuh ingkang dipuntuju swiwinipun Sampati kobong sengkleh,piyambakipun nylorot tumuju pagunungan Windya.  Sesarengan kaliyan kedadosan menika Jatayu mireng swantening wanodya ingkang bengok-bengok nyuwun pitulungan. Wanodya menika pranyata Dewi Sintaputra Raja Dasarata. Pramila nalika sumerep bilih Dewi Sinta putra saking mitranipun dipuncidra dening Rahwana, Jathayu enggal-enggal paring tetulung. Kreta kencana dipuntrajang kemawon lajeng Sinta dipun rebat. Nanging Rahwana nggegegi, boten nguwalaken, dedreg udreg-udregan, rebatan Shinta wonten ing gegana. Eman, dene Jathayu kalindhih, dipuntatoni saha dipunajar dening Rahwana. Salah satunggaling swiwi sengkleh tugel. Taksih megap-megap dipuntendhang, kumleyang ing awang-awang. Lajeng dhawah ing siti klebekan.

         Laju lampahing kretanipun Rahwana nggondhol Shinta. Badanipun Shinta lungkrah boten kanten-kantenan dipunceneng-ceneng kangge rebatan. Sakedhap-sakedhap polah nedya uwal nanging tetep kasikep dening Rahwana ingkang linambaran raos nepsu lan kasmaran dhateng Shinta. Shinta namung saged nangis sesenggukan. Sekar cundhuk, gelang tuwin kalungipun sami dhawah pating kececer. Sinten kemawon boten tegel menawi sumerep kawontenan saha polahipun menapa dene mireng tangis pisambatipun Shinta. Nanging raos menika boten dipungadhahi dening Rahwana.

Dumugi ing Nagari Alengka, Shinta dipunsumerepi kaendahaning kraton, prabot ingkang sakalangkung edi peni, mawarni-warni rerenggan, mas, intan, lan barleyan.  Nanging sedaya kala wau boten dipun rewes dening Shinta. Rahwana pengin supados Shinta menika purun dados garwanipun. Pepenginan menika boten dipungugu, Shinta malah cariyos bilih taksih piyambakipun taksih enget lan tansah setya dhateng Rama.

Mireng mekaten, Rahwana muntab nesunipun lajeng paring prentah dhateng raseksi ingkang galak ndrawasi supados njagi Shinta. Wonten ing wana, Rama kaliyan Lesmana kaget amarga nalika kondur saking beburu kidang kencana boten sumerep Shinta. Rama manggihi sekar cundhuk tuwin saperanganing anggen-anggenipun Shinta manika sami pating kececer. Rama duka sanget amarga mangertosi bilih sejatosipun Shinta sampun dipunpundhung utawi dipunculik.

Rama kaliyan Lesmana lajeng madosi Shinta ngantos dumugi wonten ing panggenanipun Jatayu menika taksih sekarat. Jatayu lajeng nyariosaken lelampahanipun  Shinta ingkang dipunplayokaken dening Rahwana. Sasampunipun paring pitudhuh marang Rama, Jatayu nemahi seda. Raganipun Jathayu lajeng dipunkremasi dening Rama kaliyan Lesmana. Tiyang kalih wau lajeng njujug lakunipun Rahwana ngantos dumugi ing Alengka.Wonten ing Alengka, Rama bungah amarga saged manggihi Shinta kanthi boten kirang setunggal menapa. Tiyang tetiganipun lajeng budhal saking negari Alengka kanthi slamet. (ilmukesaktian.blogspot.co.id)