PUPUH PANGKUR 

Assalamu'alaikum warah matullohi wabarakatuh..

kepriye anak-anakku kang tansah cinaket ing manah

bu Afi ngelingake penilaian harian 1 sing durung digarap supaya engal digarap ya....

Materi minggu iki babagan serat wulangreh pupuh Gambuh mengkone materi dicathet ana ing buku tugas difoto banjur diupload ing form kang tak cawisake y....


MATERI PASINAON :

Akeh banget Serat-Serat Jawi tinggalane para leluhur kang isi piwulang utama, ngemot pitutur pitedah kang pantes tinuladha, minangka gegaran paugeraning ngaurip.  Semono uga Serat Wulangreh uga ngemot kaya kang wis kaandharake ing ndhuwur, ananging Serat Wulangreh dhapukaning basane lumrah, tetembungane wantah, prasaja lugu, ya saka prasaja lan lugune mau sarining isine malah ketok cetha, gampang dingerteni lan ditampa, kamangka isine tetep adi luhung.

Awit saka iku ora nama maneh menawa ing jagad kajawen Serat Wulangreh iku kondhang banget. Akeh perangan-perangan kang dadi apalane wong-wong, kanggo ura-ura ing wanci senggang, kanggo rembugan ing pajagongan, kanggo wacan ing dina-dina tartamtu, kanggo barengi tabuhan slawatan larasmadya, lan liya-liyane. Isine sumebar sumrambah banget, jer isine aos lan mentes pantes dadi rengrengan palaning ngaurip.

Mula awit akeh guna paedah kanggone wong ngaurip,  ing pasinaon iki bakal diwulangake babagan Serat Wulangreh pupuh Pangkur kang isine bab tatakrama, kanthi lelambaran prabot: deduga, prayoga, watara lan reringa; bedane awon lan sae, lan carane neniteni wewataking manungsa. Nanging sadurunge kajlenterehake babagan isine kudu ngerteni dhisik babangan paugerane tembang macapat pangkur. Tembang Pangkur kalebu jinise tembang macapat. Tembang Macapat nduweni paugeran guru gatra, guru wilangan lan guru lagu.

Tegese guru gatra, guru wilangan lan guru lagu, yaiku.

a.     Guru gatra yaiku cacahing larik saben sapada (satu bait)

Guru gatra tembang Pangkur yaiku ana 7 gatra

b.    Guru wilangan yaiku cacahing wanda (suku kata) saben sagatra (satu larik).

Guru wilangan tembang Pangkur yaiku 8, 11, 8, 7,12, 8, 8. Gatra kapisan dumadi saka 8 wanda, gatra kapindho dumadi saka 11 wanda, lan gatra-gatra sabanjure uga mengkono

c.     Guru lagu yaiku tibaning aksara swara ing pungkasan gatra

Guru lagu tembang Pangkur yaiku a, i, u, a, u, a,i. Tegese gatra kapisan kudu dipungkasi ngganggo swara urip (huruf vokal) “a”, gatra kapindho dipungkasi swara “i”, lan gatra-gatra sabanjure uga kaya mengkono.

Watake tembang Pangkur yaiku awatak sereng. kanggo ing carita sing ngemu surasa sereng, sajak gregeten. Yen pitutur, ya pitutur sing sereng semu srengen; yen gandrung, ya gandrung sing sereng, gandrung-gandrung kapirangu. Lumrah uga kanggo carita ing perang.

 

Wulang Reh utawa Serat Wulangreh yaiku kasusastran awujud tembang macapat yasan Sri Susuhunan Pakubuwana IV, Raja Surakarta, kang wiyos nalika surya 2 September 1768. panjenengane jumeneng wiwit 29 November 1788  nganti tekan sedane surya 1 Oktober 1820.

Wulang ateges pitutur, Reh ateges warna-warna. Wulangreh ateges piwulang kang isine pitutur warna-warna.

KANGGO UPLOAD FOTO CATHETAN KLIK --->BUKA